Aðalbókari Síldarvinnslunnar hf.

Síldarvinnslan er eitt öflugasta sjávarútvegsfyrirtæki landsins. Það er stærsti framleiðandi fiskimjöls og lýsis á Íslandi og á sér rúmlega 60 ára sögu. Fyrirtækið gerir út fjögur skip undir eigin merkjum og rekur fiskiðjuver og fiskimölsverksmiðju í Neskaupstað og frystihús og fiskimjölsverksmiðju á Seyðisfirði. Fyrirtækið á einnig útgerðarfélagið Berg-Hugin í Vestmannaeyjum, auk þess að eiga hlut í fleiri útgerðum. Síldarvinnslan leggur áherslu á sjálfbæra nýtingu sjávarauðlindarinnar og leitast við að nota nýjustu tækni sem völ er á til veiða og vinnslu. Hjá félaginu starfa um 360 manns og leggur fyrirtækið sig fram um að bjóða upp á öruggt og gott vinnuumhverfi og samkeppnishæf laun. Síldarvinnslan hefur hlotið jafnlaunavottun frá Jafnréttisstofu sem staðfestir að hjá fyrirtækinu er ekki kynbundinn launamunur.

Neskaupstaður er blómlegt samfélag með um 1500 íbúa. Náttúrufegurð er mikil og þar er gott að ala upp börn. Í Neskaupstað er öflugt íþróttastarf og félags- og menningarlíf, gott skíðasvæði í Oddsskarði, fallegur 9 holu golfvöllur, einhver besta sundlaug landsins og fjölbreytt tækifæri til útivistar og veiða. Allt þetta gerir Neskaupstað að spennandi búsetukosti. Einnig er skólastarf metnaðarfullt og auðvelt er að fá pláss á glænýjum leikskóla, auk þess sem Fjórðungssjúkrahús Austurlands er á staðnum. Neskaupstaður er hluti af Fjarðabyggð – 5000 manna sveitarfélagi sem byggir á öflugu og stöðugu atvinnulífi. Ný veggöng til Eskifjarðar sem tekin voru í notkun árið 2017 voru bylting í samgöngumálum byggðarlagsins.