Undur og furða - níunda BRASið
BRAS hefst á ný, yfir 30 viðburðir víða um Austurland
Ekki missa af neinu ! Öll dagskráin á einum stað
Barnamenningarhátíðin BRAS verður haldin í níunda sinn í haust. Yfir 30 opnir viðburðir verða í boði víða um Austurland frá miðjum september og fram í miðjan október, auk fræðsluverkefna í leik- og grunnskólum.
Markmið hátíðarinnar er að börn og ungmenni, óháð búsetu, hafi aðgang að fjölbreyttum og faglegum listviðburðum og fái jafnframt tækifæri til að taka sjálf þátt í skapandi starfi.
Sirkus, skrímsli og sæskrímsli
Dagskráin í ár er fjölbreytt. Meðal hápunkta er ný sirkussýning Hringleiks, Shjówmen, sem sækir innblástur í fiskveiðar og sjómennsku. Sýningin verður í Sláturhúsinu á Egilsstöðum og í íþróttahúsinu á Reyðarfirði helgina 26.–27. september.
Rithöfundurinn Ævar Þór Benediktsson heimsækir bókasöfn í Múlaþingi, Skoppa og Skrítla leggja leið sína í Fjarðabyggð og á Minjasafni Austurlands verða skrímsli í forgrunni.
Í Skaftfelli verður hægt að kynnast undraheimi prentlistarinnar og í Sköpunarmiðstöðinni á Stöðvarfirði verður meðal annars unnið með pappamassa og brauðdeig.
Fjöllistakonan Kateřina Blahutová heimsækir jafnframt sex byggðarlög, frá Djúpavogi til Vopnafjarðar, með sæskrímslasmiðju þar sem börn teikna sæskrímsli sem síðan verða hluti af lifandi sýningarrými.
Listir sem hluti af skólastarfi
Fræðsla í gegnum listir hefur frá upphafi verið mikilvægur hluti BRAS.
Sláturhúsið býður í ár öllum nemendum í 6. bekk á Austurlandi upp á sirkuslistanámskeið undir stjórn Hringleiks. Skaftfell stendur fyrir myndlistarnámskeiðinu Hvaðan kemur confetti?, þar sem Hildigunnur Birgisdóttir vinnur með nemendum á yngsta stigi, og Sarah Steinar heimsækir leikskóla með tónlistarleik.
Undirbúningur og listræn stjórnun hátíðarinnar er í höndum fjögurra menningarmiðstöðva á Austurlandi; Sláturhússins á Egilsstöðum, Menningarmiðstöðvar Fjarðabyggðar, Skaftfells á Seyðisfirði og Sköpunarmiðstöðvarinnar á Stöðvarfirði. Fjöldi annarra stofnana, félagasamtaka og listafólks kemur einnig að hátíðinni.
Þora! Vera! Gera!
BRAS var fyrst haldin árið 2018 og hefur frá upphafi verið unnin í samstarfi listafólks, menningarstofnana, sveitarfélaga og Austurbrúar.
Áhersla er lögð á að viðburðir fari fram sem víðast um Austurland og að börn og ungmenni fái ekki aðeins að njóta lista heldur taki sjálf þátt í sköpun, túlkun og upplifun.
Yfirskrift hátíðarinnar er sem fyrr: Þora! Vera! Gera!
Nánari upplýsingar um dagskrá og einstaka viðburði má finna á Facebook-síðu BRAS.
Samstarfs- og styrktaraðilar BRAS 2026 eru Austurbrú, Alcoa, Fjarðabyggð, Múlaþing, Vopnafjarðarhreppur, Uppbyggingarsjóður Austurlands, Barnamenningarsjóður, Landsvirkjun og Héraðsprent.
Hægt verður að fylgjast með á Instagram og Facebook
BRAS – menningarhátíð barna og ungmenna á Austurlandi verður haldin í níunda sinn haustið 2026.
Nú sem áður er BRAS unnið í frábæru samstarfi við menningarmiðstöðvarnar þrjár á Austurlandi, sveitarfélög, skóla, stofnanir, austfirskt listafólk og List fyrir alla. Haldin verður menningarveisla fyrir börn og ungmenni um allt Austurland þar sem nýir farvegir fyrir listir og menningu verða virkjaðir.
Börn og ungmenni verða áfram hvött til að horfa inn á við og finna hvernig þau geta virkjað sköpunarkraftinn sinn, fundið sjálfið sitt og skapað á þeim forsendum. Finna hvaðan þau koma og fyrir hvað þau standa.
Við hlökkum til að halda áfram að skapa, njóta, minnka fordóma og fjarlægðir, hlúa að samkennd og virðingu fyrir öllum og njóta lista og menningar í heimabyggð með börnunum okkar.
Viðburðir
Samvinna um öflugt menningarstarf
Við trúum því að öflugt menningarstarf sé ein af grunnstoðum samfélagsins. Þess vegna var BRAS – menningarhátíð barna og ungmenna á Austurlandi sett á laggirnar árið 2018.
BRAS er samstarfs- og samvinnuverkefni skóla og sveitarfélaga á Austurlandi auk menningarmiðstöðvanna þriggja á Austurlandi og Listar fyrir alla. Verkefnisstjórn er í höndum Austurbrúar.
Frá upphafi hefur verið samstaða um að hátíðin sé bæði metnaðarfull og fjölbreytt og í dag er BRAS einn af stóru árlegu menningarviðburðunum á Austurlandi.
Hátíðin er samstarfsverkefni sveitarélaganna, menningarmiðstöðva á Austurlandi, List fyrir alla og Austurbrúar.
Styrktaraðilar
Aðalstyrktaraðilar hátíðarinnar eru Barnamenningarsjóður, Sóknaráætlun Austurlands og Alcoa Fjarðarál
–
Fyrir nánari upplýsingar, vinsamlegast sendið tölvupóst á
netfangið: [email protected]