RITLISTARNÁMSKEIÐ UM HETJUFERÐINA (THE HERO´S JOURNEY)
Egilsstaðaskóli
13. April, 2023 - 16. April, 2023
Í Egilsstaðaskóla helgina 13. – 16. apríl (16 klst.)
Leiðbeinandi Björg Árnadóttir, rithöfundur og ritlistarkennari
Kynningarmyndband um námskeiðið
Hetjuferðarnámskeiðin sækja skúffuskáld jafnt sem útgefnir höfundar en einnig þau sem vilja nota aðferðina til að grúska í sjálfum sér og samferðafólki sínu.
Sum skálda upp söguþráð og persónur á meðan önnur rýna í hetjuferðir eigin lífs.
Ólík nálgunin dýpkar upplifun allra.
Hvað er Hetjuferðin?
Ævafornt minni Hetjuferðarinnar hefur fylgt mannkyni frá því að við fórum að segja sögur og átta okkur á umbreytingamætti sagnalistarinnar.
Hetjuferðin er þekkt bókmenntahugtak sem í sí auknum mæli er líka notað til sjálfsskoðunar:
Hetjan í sínu þekkta umhverfi heyrir kall til breytinga en til að hlýða kallinu þarf hún að yfirstíga innri og ytri hindranir.
Hún stígur inn í óþekktan heim ævintýrisins þar sem ögrandi þrautir og þroskaverkefni bíða, hlýtur þar eldskírn og öðlast gjöf í ferli friðþægingar og sátta.
Umbreytt snýr hetjan aftur til síns þekkta umhverfis með gjöfina sem gagnast samfélagi hennar öllu.
Spjall um Hetjuferðina í þættinum Segðu mér
Hlaðvarpsviðtal um Hetjuferðina
Öll þekkjum við ferðalag hetjunnar úr goðsögum og ævintýrum sem og úr bókum og bíómyndum samtímans en ekki síst af eigin reynslu.
Á námskeiðinu fléttar Björg Árnadóttir hugmyndum og aðferðum Joseph Campbell, Chris Vogler og Paul Rebillot saman við eigin þekkingu og fjörutíu ára kennslureynslu.
Aðalheiður Sigursveinsdóttir (Hetjuferðin haustið 2022):
,,Ævintýraþráin espaðist upp í okkur, eitthvað óvænt var alltaf um það bil að fara að gerast.
Hvert úr sinni áttinni hófum við þetta ferðalag, stigum út úr hversdeginum og inn í óvissuna.
Við fengum nýjar áskoranir í hæfilegum skömmtum og þannig lækkaði efasemdabrekkan smátt og smátt.
Taumhaldið var fumlaust og fræðandi.
Þessi ferð var engri lík, vísbendingarnar eftirminnilegar, en gullið tókum við með okkur heim.”
Frekari upplýsingar: [email protected] / s. 899 6917
