Uppfærist á 60 mínútna fresti

Skemmtilegt um Neskaupstað

Kajakklúbburinn Kaj í Neskaupstað er elsti kajakklúbbur landsins.

Oddskarð er miðstöð skíðaiðkunar í Fjarðabyggð og oft kallað „Austfirsku Alparnir.“

Neskaupstaður

Vegalengd frá Egilsstöðum

67 km.

Dæmi um gönguleiðir

Fólkvangur Neskaupstaðar, Gerpissvæðið, Hengifoss í Seldal

Menningarhús/söfn

Safnahúsið (Náttúrugripasafnið, Málverkasafn Tryggva Ólafssonar, Sjóminja- og smiðjusafn Jósafats Hinrikssonar)

Sundlaug

Sundlaug Norðfjarðar/Stefánslaug

Íbúafjöldi

1.532

Neskaupstaður er sá þéttbýliskjarni sem stendur austast á Íslandi. Bærinn stendur á myndrænum stað við rætur himinhárra, fagurra fjalla. Fjörðurinn og fjöllin sem umlykja hann bjóða óteljandi möguleika til afþreyingar, til dæmis fjölbreyttar gönguleiðir og hestaferðir.

Þungarokkshátíðin Eistnaflug er haldin árlega í Neskaupstað. Ljósmynd Helga Kvam

Neskaupstaður komst fyrst í vegasamband við aðra þéttbýliskjarna árið 1949, með veginum um Oddsskarð sem þó var ekki fær nema hluta úr ári. Með tilkomu Norðfjarðarganga 2017 komst Neskaupstaður loksins í öruggt vegsamband við Eskifjörð. Neskaupstaður er þekktur fyrir líflega tónlistarsenu en ein af þekktari sumarhátíðum á Íslandi, þungarokkshátíðin Eistnaflug, er árlegur viðburður. Safnahúsið er líka áhugavert fyrir þá sem vilja kynna sér menningu svæðisins en þar eru þrjú flott söfn undir einu þakiNáttúrugripasafn, Sjóminja- og smiðjusafn Jósafats Hinrikssonar og Myndlistarsafn Tryggva Ólafssonar.  

Afþreying

Eitt af því sem er sérstaklega heillandi við Neskaupstað er að þar hefur gömlum bryggjum verið haldið við og á sumrin getur verið mjög líflegt við sjávarsíðuna í bænum. Þaðan er hægt að fara í bátsferðir en það er magnað að sjá landslagið í Norðfirði, þ.m.t. Rauðubjörg, af sjó, og stundum sjást hvalir. Á landi er er skemmtilegt að keyra í gegnum þorpið, eins langt í austur og hægt er, til þess að skoða fólkvanginn sem er fyrir utan bæinn. Þar eru fjölmargar gönguleiðir og fjölskrúðugt fuglalíf undir bröttum hlíðum Nípunnar, auPáskahellis sem er í fjörunni. 

Neskaupstaður er með stærri byggðakjörnum á Austurlandi og þar er Umdæmissjúkrahús Austurlands. Þjónustustig bæjarins er gott, þar eru til dæmis góðir veitingastaðir og hótel.

Tillögur

Ganga – eftir stígnum sem liggur frá snjóflóðavarnargarðinum, rétt við tjaldsvæðið, en útsýnið frá honum yfir fjörðinn er magnað.

Bragð af lókal lambakjöti eða fersku sjávarfangi á einhverjum af veitingastöðum bæjarins, eða lautarferð í Lystigarðinum.

Bað í Stefánslaug (þar er rennibraut og magnað útsýni), sem er í miklu uppáhaldi hjá heimamönnum.

Bíltúr í gegnum bæinn, að bílastæðinu við Fólkvanginn, og skelltu þér svo í gönguferð.

Þorbergur Ingi Jónsson

Uppáhalds staðurinn minn er Drangaskarð milli Norðfjarðar og Mjóafjarðar. Um það liggur gömul þjóðleið og útsýnið yfir Neskaupstað, fjörðinn, flóann og Barðneshornið fyllir mig mikilli vellíðan en átthagafjötrarnir láta líka á sér kræla. Ég hef gengið oftar en ég hef tölu á upp í Drangaskarð og það er alltaf jafn gott og gefandi.

Þorbergur Ingi Jónsson, ofurhlaupari frá Neskaupstað

Önnur Bæjarfélög